الأربعاء، 16 مايو، 2012

رساله الي حزب الكنبة


السلام عليكم ورحمة الله وبركاته

 
أنا قررت أعمل التدوينة دي .. بعد إلي شفته والي سمعته الأيام إلي فاتت دي ..
 
أبتدئ الموضوع من النقاش مع ناس اعرفهم ..
 
بقول له ها تنتخب مين ..؟
 قالي والله مش عارف بس كل .. الناس ها تدي لشفيق وكفته رجحه
 
قلتلو برضه ها تدي لمين ؟
 
 قالي ها اعمل زي الناس وادي لشفيق
 
قلت له إنت شايف كدا . وكان هاين عليا أعيط لأني مش عارف أتكلم معاة إزاي دا !
 
المهم قلتله أنتا عايز تنتخبو لية قال لي هوا الوحيد إلي ينفع للمرحله دي
 
قلتله إزاي ؟ قالي زي الناس راجل برنامجه حلو ..
 
قلتله هوا إنتا شفت برنامجه قالي لأ
 
 قلت له امال اية برنامج حلو دي ؟
 
قالي يعني كلامه حلو قلت له طب وهوا الواحد ها يغلب في كتابة كلام حلو ؟
 
دا راجل فاسد وإحنا عملنا ثورة علي شان معدناش نشوف الناس دي  ..
 المهم يعني لقيته معندوش استعداد إنو يتناقش زي ما يكون متبرمج  المهم .. الشخص دة أنا اعرفه معرفة قوية
 
 . رحنا انا وهوا عند ناس معارف في  دمياط لقيت وإحنا مشين في دمياط شارع الكباس يوم الجمعة 11/5
 
لقيت ناس رفعين صور للمشير أول كلمة نطقتها (العبد يحب جلادة) .
 
يعني ناس تقول  يسقط يسقط حكم العسكر ، طب مسألتش نفسك لية لما يقوله كدا بيموتهم  و بيتقتلهم  ؟
 
 وفي نفس الوقت دا لو جينا نفكر نفس الشباب الي بتقول يسقط يسقط حكم العسكر بيتقدمه للتجنيد ومحدش منهم بيتهرب .. مش كرة في الجيش لاء المصري عندو عقيدة قتالية ثابتة بس للأسف القيادات بتغيرها للأفراد
مثال
ممكن اللواء يقول  عرفين دول دول قتلو زميلك و عمله وسو و هما لا حول لهم ولا قوة معزولين في الجيش ميعرفوش ان القيادات تستخدمهم في لعبة وسخة
 
طب سؤال للجندي .. أيام نزولك للشوارع مش كانت الناس مرحبة بيك وبعدين مجلسك الموقر (مجلس الخزي والعار) عراك قدام الشعب كلو وخلي كرامتك في الارض ؟ استخدمك في لعبة سياسية قذرة
 
معلومة:إسقاط المجلس سياسياً لا يسقطه عسكرياً
 
 
المهم طلعت اعت مع واحد انا والشخص دا .. فا بتكلم في موضوع المظاهرة دة .. وإن الي ماشين فيها ماشين بطريقة غريبة ومش منسقة بدليل إنهم و هما  دخلين من شارع لـ شارع عطلوا الطريق
 
لقيت الشخص إلي إحنا رحنا له  دا ..
 
علي فكرة انا كنت ماشي في المظاهرة دي يا ايهاب ، والناس دي مش موجها ، دا نبض الشارع الحقيقي مش العيال الي بتروح التحرير وتقولك يسقط يسقط حكم العسكر .  الجيش دة هوا إلي حمينا وعلي جسسنا لو أسقطوه  و ما ينفعش جيش مصر يسقط  (وشغل حافظ مش فاهم دة ..)
 
المهم حولت محتكش معاة في كلام لان النوع دا يستفزني لدرجة غبية إني ممكن افقد أعصابي ..
 
قالي طب انا ها أشهدك شهادة حق قلت له  أتفضل ..
 
قالي عجبك الي حصل في العباسية دا راحين يقتحمه وزارة الدفاع ..
 
عرفين الايموشن دة :D
 
أنا بينت سناني زيو بظبط وربنا :D
كل ما افتكر شكلي كان شكلي مسخرة :D
المهم .
 
قلتله  طب بمناسبة العباسية .. بقي والكلام الي حضرتك بتقوله ..
 
أولآ كل شخص يكلفلو حق الاعتصام السلمي تمام ؟
 
 قالي بس مش قدام وزارة الدفاع ..
 
قلتلو لاء طلاما التحرير الكل مسقعله ممكن الاعتصام يتنقل في اي مكان طلاما محدش بيسمعلي .. وطلاما انا سلمي ..
 
قالي برضو مينفعش دا الجيش يا ابني ..
أمت باصصله كدة .. لقيته بيهز راسو عرفين هزة الثقة دي وعوجه البؤ :D .لقيته بينفزها
 امت مبتسمله وقلتله انا مش ها ينفع أتكلم بعد الكلام الي انتا قلتة دة .. (بيني وبين نفسي ، انتا لو مفيش فرق بيني وبينك حوالي 19 سنة كان زماني رضيت عليك بأسلوب مش تمام ..
 
 
المهم قلتلو . اولآ حق الاعتصام السلمي مكفول لأي حد ولأي شخص ولأي تيار .. ومن حق الجميع إن هوما يعتصمو طول ما في مطالب عايرنها .. ومتحققتش
 
أنا معاك انو غلط يعتصموا لشخص والكلام دا كلوو بس مينفعش يتعدي عليهم .
 
 قالي وهوا الجيش أتعدي عليهم ؟!
 
قتلو لاء الجيش جاب بلطجيا يتعدوه عليهم
 
قالي لية هوا الجيش ناقص رجل ولا أيد دا اقوي جيش في المنطقة ..
 
واداني ترتيب توفيق عكاشة نفسه ميقولوش  . الجيش المصري يا ابني  الثالث علي العالم وعلي فكرة بقي الحسنة الوحيدة الي حسني مبارك عملها هيا انو قوي الجيش المصري ..
 
نفس الايموشن :D ..
 
قلتله علي فكرة في كلام كتير مغلوط في الإعلام مينفعش ان واحد عاقل ينساق وراة أنتا عارف ان تسليح الجيش كلو تسليح أمريكي .. دا غير انو بيكون تسليح عفا علية الزمن يعني كل قطعة سلاح عندكـ معروفة ومعروف مصدرها وعندهم المضاد ليها ..
طب فين التكتيك والإستراتجية  بتاعه الجيش ؟!
الجيش إلي معتمد كل اعتماده علي سلاح بيفوت علية الزمن في أمريكا ويبعتهولك  ، وبعدين مبارك كان هوا والقادة بيعملو علي إضعاف الجيش مش تقويته
قلتله طب ممكن نرجع للنقطة الي كنا بنتكلم فيها وهيا التعدي
طبعآ هوا من النوع الي هوا ممكن الموضوع يبتدي بحاجة ويدخلك في مليون حاجة .. المهم رجعنا للموضوع
قلتلو في حاجة اسمها حقوق الإنسان .. صح ؟
 
 قالي مالها يعني
 
قتله لو الجيش ضرب المتظرهين وفض الاعتصام السلمي ها يفضح نفسه إنما هوا يجيب بلطجية ويصدر الشعب للشعب
 
 قالي واية دليلك علي كده قلتله الدلايل كتير لو تحب أعدلك
 
 قالي عدلي
 
قلتله أولآ الخرطوش إلي كان بيضرب من البلطجية علي المعتصمين كله إنتاج المصنع الحربي اية رائيك ؟
والأكل الي كان لما الشباب راحو  المكان الي كان فية البلطجية لقوة اكل عبارة عن وجبات جاية من مكان عسكري (مش فاكر اسمو والله)
 
 قالي وأية الدليل علي كده
 
 قلتله في صور وفضايح  .. في كل مكان بص يا عم محمد من الاخر .. كدة
هيا الحقيقة وحدة بس كل واحد وثقافته أنتا عايز تطلع المجلس العسكري انو غير متواطئ وغير متخاذل دي وجهة نظرك بس الحقيقة غير كدة
كل واحد يحلل من وجهة نظرة بس الحقيقة واحدة المجلس العسكري كلب مبارك ومتواطئ وراكب الثورة ومدلدل رجلية وحولها لانقلاب عسكري باحت صح ولا انا غلطان

(علي فكرة انا مش ها أجيب اي صور في التدوينة دي بس ممكن لو عايز تعرف دور و شوف وابحث علي شان ماتنساش لاإننا بننسا بسرعة  وأنا لو جبتلك الدليل ها تنساة لو دورت علية بنفسك بهدف انك تدور علي الدليل بهدف انك عايز تعرف الحقيقة عمرك ماتنساها )

 قالي لو في كل العبر مينفعش يسيب الدوله  طب يروح فين إزا كان هوا موجود وفي بلطجة و و و ؟!!
 
 
قلت له  دا علي أساس إنهم لو مش عايزين يجيبه البلطجية مكنوش جبهم معني كدة ان جيشك ضعيف
 
 قالي لاء مش ضعيف بس ملوش في العمل بتاع الناس المدنين إلي زيي وزيك
 
قلتله اونا راضي ذمتك طالما ما هوا ملوش يدخل فية لية ؟ (طبعا هدفي الوقتي اني اوريله تناقض كلامه) المهم قالي انتا ها تنتخب مين؟
 
 قلتلو ما تخلينا نكمل
 
 قالي ها تنتخب مين بس
 
قلتله لسا مقررتش
 
 قالي انتخب عمرو موسي .. امت باصص له  بصة كدة قالي اة مهوم شباب الثورة مش عجبهم
قلت له وهوا عجبك ؟
 
 قالي اة راجل عندو شبكة اتصلات عالمية يبني ليك  اقتصادك في لحظة ورجل دوله  .. وراجل هيبة وخبرة وحنكة عن غيرة ..
 
تقلت بلساني مردتش ارد علية علي شان يجيب كل الي في بطنة
 
قالي بص يا ايهاب انتا لسا صغير يا حبيبي و عاوز   أوصلك حاجة إلي انتا لسا ها تفكر فية انا فكرت فية ..

برضه تقلت
 
قالي بص م الاخر لو جبت ابن حسني مبارك من السجن
جمال و حطيتة ها يعمل الي الشعب عايزة
 
قلتله وانتا عامل ثورة علي شان كدة
 قالي إيهاب هيا فين الثورة لو في ثورة فين المحكمة الثورية يا بتاع المدارس
قلتله ما هوا كلامك دة وتأيدك لشخص زي دة . وتأيدك ايام الـ 18 يوم انا معرفكش ايام الثورة بس كلامك بيدل علي موقفك . يعني .
 حسيت انو عطل كدة ..
وقالي يعني اية قلتله يعني لو كنت حضرتك مكنتش قلت العيال الي في التحرير دول بيعمل اية . كان زمان بقي في محكمة ثورية لو كنت حضرتك نزلت وسهمت
 
وكانت الثورة بقي ليها زعيم بس هوا قبيل من الناس الي عطل الدنيا بخوفهم .. (نعمل اية العبد يحب جلادة )
كلو خايف
وكان في تون غريب ظهر اياميها ..
اهو الي نعرفة احسن من الي منعرفوش والناس أعدت تعيط وتبربر
..
 قالي كلمة حرقت دمي قالي بص انتا سواء ها تأيد ابو الفتوح ها تأيد صباحي أو ها تأيد

خالد علي العيل دة ابو شخة الي ميعرفش يمسك وزير حتا .

 طبعاً الوصف معجبنيش 
 قالي كله ها يقدم  تنازلات لعمرو موسي طبعا أضطريت  إني انهي النقاش . لان مكنش عندي استعداد بعد الاستفزاز الي حصل دة . والكلام
حافظ مش فاهم أني أتناقش معه تاني ..
 


فا رسالتي إلي حزب الكنبة :
 
بص حوليك شوف في ثورة في مصر والله في ثورة
 وبمجرد انتخابك لواحد كان في النظام القديم أو علية شبهات من النظام القديم
 كده انتا بتقضي علي الثورة ، وكل كدة الثورة لازم تنجح ولو بعد 50 سنة بس يوميها حفيدك ها يدعي عليك وأبنك كمان ها يدعي عليك
 ما تتنتخبش فلول  لان في شباب  مات علي شان يكون في ثورة وقدم روحه للبلد فدانا كان الشباب عارف ان الأمن بيقتل الناس و بينزل  علي شان نسقط ديكتاتور والديكتاتور لسا ما سقطش  .. مش عايزين نرجع تاني نعيد نظام كان يسرقني ويسرقك ضيع حلمك . ضيع حلم أبنك فكر شويا مين الي عايز الناس دي يكونوه موجودين ..؟
علي شان يكونوه  هوما الي ظهرين ويتحكم فيا وفيك تروح المجلس المحلي ويعملك حاجة من حقك كأنها خدمة و بيكسر عينك بيها  

بص في مدينتك ها تلاقي الناس إلي كانت يتمشي ورا مرشحين الحزب الوطني إلي كانت ايام الثورة كانت عايزة تهد الثورة ومش عايزة الثورة تنجح عايزة يكون النظام القديم هوا إلي سايد عرفين لية علي شان ليهم مصالح شخصية وها يتحاموا فية علي شان كدة بيحرب الثورة
 أنتا ملكش دعوة بكلام دة؟! ،  يبقي ما تسعاعدهمش  إنهم يضيعو حلم شاب كان نازل ايام الثورة وقايل لأمو انا نازل وها اجي اتغدي  ومرجع لهاش
 ماتضيعوش حق خالد سعيد إلي ضربوه وقتلوة وبهدلوة وشوهوة وطعنووو فية وقالو دا بيشرب مخدرات  لو إبنك ترضي حد يقول علية كدة لو أخوك ترضي حد يقول علية كدة

فكر شوف مين المستفيد الاول والاخير من تواجد الفلول واحد زي شفيق او موسي
 

و محدش يضحك عليك ويقولك اي حد هايجيي هايعمل الي الشعب عايزة الثورة دي اتعملت علي شان تسقط نظام وفساد متحولش تكون انتا جزء من الفساد وماتنسقش ورا كلام ومتفكرش في مصلحتك وبس ، مرشح او حمله مرشح في ديرتك وعدتك انها ها تعملك وتسويلك مش ها اقولك إنتخب مين بس ها اقولك إنتخب حد من الثورة خلي الثورة تحكم اديها الفرصة تحكم ومش هاتندم صدقني والله لو الثورة حكمت مصير مصر والبلاد الي حوليها هاتكون احسن صدقني ومتنسقش ورا كلام وبس فكر وركز ..
 
الجيش المصري . المجلس العسكري دخل بية لعبة سياسية علي شان يحمي مبارك أحموا الجيش بوقفكم ضد الفلول ابنك الي داخل يتجند  دة بيستخدمه في حرب اقل ما يقول عليها إنها حرب وسخة علي شان يحمو مبارك
وبيشوهو تشويه جامد قوي في المرشحين الثورين وبيقولو ليهم كلام بالباطل متنسقش ورا كلام حد وانا مش بفرض عليك رائي بس انا بقولك إحنا في ثورة
 يعني هدم فساد وبناء امجاد زي ما قال الشيخ الشعراوي وإحنا لساا في هدم الفساد
 وزى ما قلت لك قبل كدة فكر وشوف مين المستفيد من اليله دي كلها هوا نفس الشخص الي كان مستفيد من عضو مجلس الشعب في ديرتك الي كان يمشي وراة ويطبله ويهلل علي شان ياخد منه فلوس
والفلول لو حكمت أمثال
عمرو موسي
أحمد شفيق

 مصر مش هتقوم لها قومة

فكرك إن الشباب مش ها تسكت الشباب والناس الي خيفة علي الثورة مش خايفة علي كرسي او علي فلوس او منصب  الشباب الحقيقي الي خايف علي مصر مش ها يسكت وها ينزل الميادين وها يطالب بإسقاط النظام
 فكرك إن لو احمد شفيق مسك ها يحاكم مبارك ؟

ها يجيب حق الناس إلي ماتت؟

 ها يحاسب المسؤلين هايحاسب حد من الي اخطائ ؟.في المجلس العسكري ؟!
 
حكم عقلك وجاوب علي السؤال دة . وشوف برضو مين المستفيد؟!

هناك 4 تعليقات:

  1. كلام جميل وصحبح فى كل ماقلت والشعب المصرى أقل ما يوصف به الطيبه الزائده عن الحد لدرجة أن هناك من بكى عندما سمع مبارك فى خطابه قبل الأخير عندما قال أنه يريد أن يموت ويدفن فى مصر فالشعب المصرى استحلى ظل يضرب على قفاه أكثر من 30 سنه ذاق فيها كل أصناف الذل والمهاته ولم يكن يفتح فمه فهو استحلى ضرب القفا ولم يعد يستطيع الغيش بكرامه ولذلك يحن الى جلاديه ويريد عودتهم مرة أخرى وبعدين المجلس العسكرى لعبها صح وخقق مايريد لأنه نزل لحماية النظام لأن الشعب بدأ يزحف على القصر الجمهورى وكان سينتقم من كل من بقع فى ايدى الثاءرين ولكن نزول الجيش أفسد كل شئ وأنا على يقين أن المجلس العسكرى لن يسمح برئيس الا موسى أوشفيق وستزور الأنتخابات لصالح أحدهم وهنا ستقوم ثوره ولكنها ستكون دمويه لأن الجيش سيقف ضد الثائرين حماية لنفسه من الخساب وعموما ستكون نهايهم جميعاسواء مجلس عسكرى أو قضاه فاسدين وكل من كان ينتمى للحزب الوطتى المنحل سيكون مصيرهم نفس المصير الذى لاقاه القذافىى انشاء الله وأتمنى لك التوفيق

    ردحذف
    الردود
    1. ردك رد تحفيزي وقوي يخليني اسمتر في إلي أنا بقوله يا أستاذ/عادل ..

      فعلآ الجيش منزلش يحمي الثورة بلعكس كان نازل يحمي الديكتاتور سامى عنان رئيس أركان الجيش المصرى يؤكد للولايات المتحدة الأمريكية ولاء الجيش المصرى لمبارك زي ما قال موقع ستار فورالإخبارى الأمريكى ( المتخصص فى التقارير المخابراتية ) ، يوم 25 يناير 2011 فى تقريره عن الثورة المصرية ودا لينك التقرير
      http://www.stratfor.com/analysis/20110125-dispatch-day-rage-middle-east

      حذف
  2. جميل يا إيهاب كلامك دا .. لكن هاتوصله لحزب الكنبه إزاي ؟
    أرجو إنه ميتعداش رسالة بدون عنوان

    ردحذف
    الردود
    1. ها توصل لحزب الكنبة من خلالي ومن خلالك . من خلال اعدنا معاهم وتوعيتهم بخطورة الموقف لو كتبت الكلام دة او طبعتة علي ورقة واديتهم يقرأوة نقدر نوصلهم .. بجد انا حزين من الي بسمعو كل يوم في الشارع والموصلات ..وشكرآ لرد حضرتك التحفيزي دة .

      حذف